“ඉතින් සීයා ආපහු ඒක බලන්න ගියෙ නැද්ද?”

“නෑ. ඊට පස්සෙ නම් යන්න ලැබුණෙ නෑ. අපේ අය ටිකක් දුරින් වෙන පතලක් හොයාගත්ත නිසා මට ඒකෙ වැඩට යන්න වුණා. දැන් මේ පුතා එක්ක කතා කරනකොට හදිසියෙ මතක් වුණාට මට ඕක ගැන අමතක වෙලා තිබුණෙ.”

එම කන්ද තිබූ ස්ථානය ගැන සීයා පැවසූ විස්තරය අටෝනිට යන්තම් මතක තිබුණි. මේ පිළිබදව ජෙරම්ට පැවසුවහොත් තමන්ට සැලකිය යුතු මුදලක් උපයාගත හැකි බව අටෝනිට කල්පනා විය. නමුත් හෘද සාක්ෂියට එකගව ඔහුට එය පිටස්තරයෙකුට පැවසිය හැකි නොවිය. කෙසේ වූවද මතු වී ඇති ආර්ථික අපහසුතාවය අනුව හෘද සාක්ෂිය හෝ පියාගෙන් ලැබුණු ඉඩම යන දෙකින් එකක් තෝරා ගැනීමට ඔහුට සිදු විය. තීරණය එතරම් අපහසු නොවිය. ඒ අනුව ඔහු ජෙරම්ට මේ පිළිබදව පැවසුවේය. සැබවින්ම අටෝනි සිතුවාට වඩා වැඩි මුදලක් ජෙරම්ගෙන් ඔහුට ලැබුණි. එසේම අටෝනිගේ සීයා පැවසූ එම වස්තුව ඇති ස්ථානය සොයා ගැනීමට හැකි වුවහොත් ලබා දෙන්නේ යැයි ජෙරම් පොරොන්දු වූ මුදල අටෝනි සිහිනෙන්වත් නොසිතූ අගයකි. සැබවින්ම එය ඔහු නිවස සෑදීම සදහා ලබා ගත් බැංකු ණය මුදල මෙන් කිහිප ගුණයක් විය.

* * *

දිනය – 2023 මැයි 8

ස්ථානය – පේරු දේශය

ජෙරම්ගේ ඉල්ලීම මත පසුදින උදෑසනින්ම අටෝනි තම සීයා පැවසූ ඒ අද්භූත වස්තුව සෙවීමට පිටත් විය. සීයා පැවසූ පරිදි එය තරමක් අවදානම් ගමනක් වූ හෙයින් ඔහු එම ගමනට තමන්ට වඩාත් විශ්වාසවන්ත වූ තම සොහොයුරා අහොතේව සම්බන්ධ කර ගත්තේය.

හෝරා කිහිපයකට පසුව කදු මුදුන ආසන්නයේ තිබූ ගුහා විවරය සොයා ගැනීමට ඔවුන්ට හැකි විය. ගුහාව තුල අඩි කිහිපයක් ඇවිද ගිය ඔවුන්ට එය වංකගිරියක් බව අවබෝධ විය. කෙසේ වූවද අවශ්‍ය උපකරණ රැගෙන පැමිණි නිසා එය තුල ආරක්ෂිතව ගමන් කිරීමට ඔවුන්ට හැකි විය.

තවත් හෝරාවකට පමණ පසුව සීයා පැවසු අද්භූත වස්තුව සොයා ගැනීමට ඔවුන් දෙදෙනාට හැකි විය. එදා සීයාට ඒ පිළිබදව පැහැදිලි අදහසක් නැති වූවද අටෝනිට නම් ඒ කුමක් දැයි අනුමාන හැකි විය. මෙය යානාවක් විය යුතුය. නමුත් එය කිසිසේත්ම මිනිසා විසින් නිපදවූ එකක් විය නොහැක. මෙම යානාව මෙම ගුහාව තුලට කෙසේ පැමිණියේ දැයි ඔහුට සිතා ගැනීමට නොහැකි විය. යානාවෙ ප්‍රමාණය අනුව එයට ගුහා විවරය තුලින් කිසිසේත්ම ගමන් කළ නොහැකි විය. අටෝනිගේ සීයා මෙය දැක ඇත්තේ මීට වසර හැටකට පමණ ඉහතදීය. නමුත් අදටත් එහි පිටත බද මලකඩ කෑමකින් හෝ විඛාදනයකින් තොරව මනාව ආරක්ෂා වී ඇති බව එය පරීක්ෂා කර බැලූ අටෝනිට සහ අහොතේට දක්නට ලැබුණි.

අහසින් ගමන් කරන දෙවියන් ගැන කියවෙන විවිධ ජනකතා ඔහුගේ උපන් ගමේ වැඩිහිටියන්ගෙන් අටෝනි මීට පෙර අසා තිබුණද ඔහු ඒ පිළිබදව එතරම් තැකීමක් නොකළේය. නමුත් එම ජනකතා වල යම් සත්‍යතාවයක් ඇති බව මේ අද්භූත වස්තුව දුටු වහාම ඔහුට කල්පනා විය.

තමා සතු ජංගම දුරකතනයෙන් ඡායාරූප සහ රූපරාමු කිහිපයක් ලබාගත් අටෝනි සහ අහොතේ ආපසු ඒමට පිටත් වූයේ ජෙරම්ට පැවසීම සදහා විස්තර ගොන්නක් සහිතවය. නමුත් ඔවුන් දෙදෙනාට වනාන්තරයෙන් පිට වීමට ඉඩක් නොලැබුණි. වනාන්තරය අවසන් වන සීමාව ආසන්නයේදි එක්වරම කඩා පිනූ ගිනිඅවි අමෝරාගත් පිරිසක් ඔවුන් දෙදෙනාගේ දෑස්, දෙපය සහ දෙඅත් බැද වාහනයක් තුලට දමා ගත්තෝය.

ඔවුන් දෙදෙනා රැගත් වාහනය මිනිත්තු විස්සක් පමණ ගමන් කළේය. දෑස් බැද තිබූ හෙයින් ගමන් කළ ස්ථානය හෝ දිශාව පිළිබදව කිසිදු අදහසක් ඔවුන්ට නොවිය. නමුත් හදිසියේම වාහනය නතර කළේය. ඔවුන් දෙදෙනාව වාහනයෙන් පිටතට ගෙන, නිවසක් තුලට ගෙන ගොස්, පුටුවකට හින්දවීමෙන් පසුව ඔවුන් දෙදෙනාගේ දෑස සහ දෑත බැද තිබූ බැමි කිසිවෙකු විසින් ලිහා දැම්මේය.

ඔවුන් ඉදිරියේ සිටගෙන සිටියේ කළු පැහැති අංගසම්පූර්ණ යුරෝපිය ඇදුම් කට්ටලයකින් සැරසුණු මැදිවියේ මිනිසෙකි. ඔහු සිනාසෙමින් දෙසොහොයුරන් දෙස බලා සිටියේය.

“අටෝනි සහ අහොතේ. අපිට සමාවෙන්න ඕනෙ මේ විදියට ඔයාලව එක්කන් එන්න වෙච්ච එක ගැන. මේ දේවල් පැහැදිලි කරල කියන්න තරම් වෙලාවක් තිබුණෙ නෑ. ඒකයි මෙහෙම කළේ.” පැවසූ මැදිවියේ මිනිසා දුම් දමමින් තිබූ උණුසුම් කෝපි කෝප්ප දෙකක් දෙසොහොයුරන් වෙතට ළං කළේය.

“අපි ජාත්‍යන්තර පුරාවිද්‍යා සංරක්ෂක සංවිධානයෙන්. අපිට කතා කරන්න වැදගත් දෙයක් තියෙනව. මං වෙලාව යවන්නෙ නැතුව කෙලින්ම කාරණාවට බහින්නම්. ඔයාල දෙන්නා අද ලොකු පුරාවිද්‍යාත්මක වටිනාකමක් තියෙන දෙයක් හොයාගත්ත කියල අපි දන්නවා. ඒක ගොඩක් හොදයි. හැබැයි ප්‍රශ්නෙ තමයි, ඔයාල ඒ විස්තරේ කියන්නෙ යන්නෙ මෙක්සිකොවෙන් මෙහෙට ආපු පල් හොරෙක්ට.”

අසන්නට ලැබුණු අනපේක්ෂිත දෙයින් තුෂ්ණිම්භූත වූ අටෝනි සහ අහොතේ මුහුණට මුහුණ බලාගත්තෝය. ඔවුන් දෙදෙනාගේ නිහඩතාවය හේතුවෙන් නාදුනන අමුත්තා නැවතත් කතා කිරීම ඇරඹුවේය.

“මේක ඔයාලගෙ රට. මේ ඉතිහාසයත් අයිති ඔයාලට. හරි නම් මේ වගේ රහස් ඔයාල වෙන රටවල් වලින් ආපු හොරුන්ට දෙන්නෙ නැතුව ආරක්ෂා කරන්න ඕනෙ.”

ඉන්පසුව අමුත්තා සහ දෙසොහොයුරන් දෙදෙනා අතර අඩ හෝරාවක පමණ දීර්ඝ සාකච්ඡාවක් ඇති විය. අවසානයේදී බලහත්කාරකමකින් තොරව අටෝනිව සහ අහොතේව තමන්ට අවශ්‍යය පරිදි නම්මා ගැනීමට අමුත්තා සමත් විය. ඒ ජෙරම් ලබා දීමට පොරොන්දු වූ මුදල මෙන් දස ගුණයක මුදලක් එවෙලෙහිම ලබා දීමෙන් පසුවය.

* * *

“උඹ බොරු නෙමේ නේද මේ කියන්නෙ? මං මේ වැඩේට දැනටමත් තමුසෙලට සෑහෙන්න වියදම් කළා.” ජෙරම් මැව්ඩොක් පැවසුවේ තරමක සැක මුසු හඩකිනි.

“අපෝ නෑ සර්. මගේ මේ ඇස් දෙකෙන්ම දැක්කා. මං දිවුරන්නම්.” ස්වදේශික රතු ඉන්දියානුවා පැවසුවේ තම දකුණු අත ඔසවමිනි.

“උඹ ඇරුනහම තව කවුද ඕක දැක්කෙ?”

“මාත් එක්ක ගියේ මගේ මල්ලි අහොතේ විතරයි. එයයි මායි විතරයි දැක්කෙ.”

“කෝ දැන් තමුසෙගෙ මල්ලි?”

“ගෙදර ඉන්නවා.”

“මිනිහව අපිට විශ්වාස කරන්න පුළුවන් නේද?”

“අපොයි ඔව් සර්. මිනිහ කට හොල්ලන්නෙ නෑ.”

ජෙරම් රතු ඉන්දියානුවා දෙස බලාගෙන සුළු මොහොතක් නිහඩව කල්පනා කරන්නට විය. ඔහු නැවතත් සිය හඩ අවදි කළේ තත්පර කිහිපයකට පසුවය.

“මට තාම තමුසෙව විශ්වාස නෑ. තමුසෙ කලින් කිව්වෙ ඔය ගුහාවෙ යානාවක් තියෙනව කියල. දැන් ගිහින් ආවට පස්සෙ කියනව මමි දෙකක් තියෙනව කියල. මොකද්ද මනුස්සයො මේ හතරබීරි කතාව?”

“මං පොඩි කාලෙ අහපු දෙයක්නෙ සර්. සමහරවිට සීයා කියපු දේ මං වරද්දල තේරුම්ගන්න ඇති. කොහොම හරි මමී දෙකක් නම් තියෙනවා. සර්ටත් අපිත් එක්ක ආවොත් සර්ගේ ඇස් දෙකෙන්ම බලාගන්න පුළුවන්. එතනට යන්න එච්චර අමාරුත් නෑ.”

“හරි හරි. මං කොහොමත් හෙට එනවා. අනිත් එක… මට මේකට හොදට කල්පනා කරල උත්තර දෙනවා. තමුසෙ හිතන විදියට ඔය මමි දෙක තමුසෙටයි, මටයි, තමුසෙගෙ මල්ලිටයි උස්සගෙන එන්න පුළුවන් වෙයිද?”

“අපොයි පුළුවන්. සර් ඕනෙත් නෑ. අපි දෙන්නට විතරක් උනත් ඒව අරගෙන එන්න පුළුවන්. එක මමියක් අඩි තුනක්වත් උස නෑ.”

“නියමයි. මට ඔය මමි දෙක පරිස්සමෙන් එළියට අරගන්න ඕනෙ. වෙන කවුරු හරි දකින්න කලින්. අපිට කලින් කවුරු හරි ඕක දැකල එළියට ඇද්දොත් මං වියදම් කරපු සල්ලි ඔක්කොම වතුරෙ.”

කිසිවක් නොපැවසූ අටෝනි නමින් හැදින්වූ රතු ඉන්දියානුවා නිහඩව ජෙරම් දෙස බලා සිටියේය. අටෝනිගේ සිතෙහි වූයේ තරමක චකිතයකි. මුදලට කෑදර මේ සැරපරුෂ මහලු මිනිසා මීට හෝරා කිහිපයකට පෙර තමන්ට සහ තම සහෝදරයාට මුහුණ පෑමට සිදුවූ සිදුවීම පිළිබදව කිසිවක් නොදත්තේය. තමා මොහුව රැවටීමට උත්සහ කරන බව ජෙරම් දන්නේ නම් තමාට වෙඩි තැබීමට මොහු දෙවරක් නොසිතන බව අටෝනි දැන සිටියේය. එම නිසා ජෙරම්ට සැක නොසිතෙන අයුරින් හැකි තාක් සන්සුන්ව සිටීමට අටෝනි උත්සහ කළේය.

* * *

දිනය – 2023 සැප්තැම්බර් 12

ස්ථානය – කොන්ග්‍රස් රැස්වීම් ශාලාව, මෙක්සිකෝව

“ආයුබෝවන් ජෙරම් මැව්ඩොක්. එහෙනම් ඔබ දිවුරුම් ප්‍රකාශය දෙන්න සූදානම්ද?”

“ඔව්. මං සූදානම්.”

“හරි, මෙම ස්ථානයේ මෙක්සිකො කොන්ග්‍රස් මණ්ඩලයේ සියලුම සාමාජිකයන් රැස්වෙලා ඉන්නවා. මේ දිවුරුම් ප්‍රකාශය කරන්න කලින් ඔබ දැනගත යුතු දේ තමයි දිවුරුම් දීමෙන් පසුව ඔබ මේ කොන්ග්‍රස් මණ්ඩලයට ඉදිරිපත් කරන කරුණු අසත්‍යය බව ඔප්පු වුණොත් ඔබ නීතිය ඉදිරියේ වැරදිකරුවෙකු වෙන බව. ඔබට ඒක පැහැදිලියි නේද?”

“ඔව්. මට ඒක හොදින් පැහැදිලියි.”

“හොදයි, එහෙනම් ඔබ මේ කොන්ග්‍රස් මණ්ඩලයට ඉදිරිපත් කිරීමට යන පෘතුවියෙන් පිට ජීවින්ගේ යැයි ඔබ විසින් පවසන මෘත ශරීර දෙක සහ එයට අදාල පරීක්ෂණ වාර්තා සියල්ලම සත්‍ය බව මේ කොන්ග්‍රස් මණ්ඩල සාමාජිකයන් ඉදිරියේ ඔබ දිවුරා ප්‍රකාශ කර සිටිනවද?”

“ඔව්. මේ සියල්ල සත්‍යයක් බව මං දිවුරා ප්‍රකාශ කර සිටිනවා.”

—-කෙටි කතාව නිමි—-